Meeqqanut tapit

Meeqqat meeqqanut tapiissutinik tunineqarsinnaapput, meeraq

1. 18-it inorlugit ukioqarpat, pisortanillu toqqaannartumik pilersugaanngippat,
2. Kalaallit Nunaanni kommunimi angerlarsimaffeqarpat, meeqqanullu tapiissutinik tigusisinnaatitaasoq aalajangersimasumik Kalaallillu Nunaanni najugaqarpat, inunnillu nalunaarsuisarfimmi nalunaarsorneqarsimappat,
3. meeraq imaluunniit meeqqanut tapiissutinik tigusisinnaatitaasoq Qallunaat Nunaanni innuttaasutut pisinnaatitaappat, imaluunniit nunat tamalaat akornanni isumaqatigiissutsit malillugit Kalaallit Nunaanni ikiorsiivigineqarnissamut pisinnaatitaappat, imaluunniit meeraq taamatullu meeqqanut tapiissutinik tigusisinnaatitaasoq ukiumi kingullermi Kalaallit Nunaanni najugaqarsimappat,
4. meeqqanut inuusuttunullu ikiorsiisarneq pillugu peqqussut malillugu angerlarsimaffiup avataanut pisortanit inissinneqarsimassanngippat, aammalu
5. katissimassanngitsoq.

Tapiissutit qaammammi meeqqap 18-iliiffiani atorunnaassapput.

Meeqqat amerlassusaat ima nassaarineqassaaq:

Inoqutigiinni meeqqat tamarmik ilanngunneqassapput inoqutigiinni angajoqqaajusut katissimappata, taakkulu ukioq ilivitsoq sinnerlugu najugaqatigiissimappata. Assersuutigalugu inoqutigiinni meeqqat pingasuuppata “Meeqqat amerlassusaat”-nni 3 allassavat.

Angajoqqaajusoq kisermaajuppat angajoqqaajusup meeqqat meeqqanut tapiissutisissutigisinnaasai tamaasa kisitsinermi ilaatinneqassapput. Assersuutigalugu meeraq ataasiusimappat “Meeqqat amerlassusaat”-nni 1 allassavat.

Inooqatigiinnut katissimanngitsunut, siusinnerusukkut inooqatigisimasanit inoqutigiinni qitornaqartunut, aamma ukioq ataaseq inorlugu inooqatigiissimasunut, meeqqanut tapiissutit arlalinngorlugit avinneqassapput. Angajoqqaat immikkut tamarmik meeraannut tapiissutinik naatsorsuinermi, angajoqqaajusoq kisermaatut isigineqassaaq, taamaalillunilu angajoqqaajusup isertai namminerlu qitornai kisimik naatsorsuinermi tunngavigineqassallutik. Aappariilli taakku ataatsimut qitornaqarsimappata, ataatsimut qitornaannut meeqqanut tapiissutit aappariinnut katissimasunut malittarisassat malillugit naatsorsorneqassallutik. Assersuutigalugu ilaqutariit pingasunik meerartaqarsimappata, angajoqqaajusut tamarmik immikkut ataatsimik meeraqarlutik kiisami ataatsimoorussamik ataatsimik meeraqarlutik, taava pingasoriarlutit naatsorsuissaatit “Meeqqat amerlassusaat”-nnilu 1 allallugu.

Tunngaviusumik malittarisassaasut pillugit annertunerusumik atuagaqarusukkuit saqqaani attataasaq ”Inatsit tunngaviusoq” toqqassavat.

Meeqqanut tapiissutinik akiliisoqartillugu aallaaviatigut ilaqutariinni meeqqap najugaqarfigisaani maannakkut isertitat tunngavigineqassapput.

1. Meeqqap angajoqqaani tamaasa najugaqatigippagit marluullutik maannakkut isertitaat tunngavigalugit meeqqanut tapiissutit akilerneqassapput.
2. Meeqqap angajoqqaami aappaa najorpagu, taassumap maannakkut isertitai tunngavigalugit meeqqanut tapiissutit akilerneqassapput. Angajoqqaajusoq inooqateqaruni imaluunniit angajoqqaat katissimappata katissimasaata inooqataataluunniit isertitai naatsorsuinermi ilaatinneqassapput, massa pineqartoq meeqqamut pilersuinissaminik pisussaatitaanngikkaluartoq. Taamaattoqassappat meeqqanut tapiissutit ukiumi tunniunneqartarfigiligaanni angajoqqaajusut ukioq ataaseq sinnerlugu inooqatigeereersimassapput.
3. Inooqat ima paasineqassaaq, inuk angajoqqaap aapparmisut inooqataa.
4. Inooqatigiinnut katissimanngitsunut, siusinnerusukkut inooqatigisimasanit inoqutigiinni qitornaqartunut, aamma ukioq ataaseq inorlugu inooqatigiissimasunut, meeqqanut tapiissutit arlalinngorlugit avinneqassapput. Angajoqqaat immikkut tamarmik meeraannut tapiissutinik naatsorsuinermi, angajoqqaajusoq kisermaatut isigineqassaaq, taamaalillunilu angajoqqaajusup isertai namminerlu qitornai kisimik naatsorsuinermi tunngavigineqassallutik. Aappariilli taakku ataatsimut qitornaqarsimappata, ataatsimut qitornaannut meeqqanut tapiissutit naatsorsorneqassapput aningaasarsiaasa ataatsimoortinneri tunngavigalugit soorlu immikkoortoq 1-imi allaaserineqarsimasoq.
5. Meeraq ilaqutariinni allani privatimik paaqqutarineqarpat ilaqutariit paarsisartut isertitaat tunngavigalugit meeqqanut tapissutit tunniunneqartassapput. “Ilaqutariit paarsisartut” paarsisinnaanermut atuuttumik akuersissuteqarsimanngippata, meeqqanut tapiissutit malittarisassaq pingaarneq malillugu naatsorsorneqassapput, imaappoq angajoqqaat isertitaat tunngavigalugit naatsorsorneqassallutik.
6. Meeraq skolehjemmimiippat assigisaanniluunniit, sumiiffimminilu inunnik nalunaarsuisarfimmut nalunaarsorneqarsimalluni, inunnik nalunaarsuisarfimmi kingullermik meeqqamut angajoqqaatut nalunaarsorneqarsimasup isertitai tunngavigalugit meeqqanut tapiissutit akilerneqartassapput. Meeqqap skolehjemmimi assigisaanilu aallartinnissaa pisinnagu ilaqutariinni allani privatimik paaqqutarineqarsimappat, ilaqutariit paarsisartuusimasut isertitaat tunngavigalugit tapiissutit tunniunneqartassasut kommunimi najugaqarfigisami isumaginninnermut ataatsimiititaliap aalajangersinnaavaa. Taama pisoqakkajuttarpoq meeqqap angajoqqaani attaveqarfiginngippagit kisiannili angajoqqaarsiani suli attaveqarfigalugit.
7. Angajoqqaat najugaqatigiinngippata meerarlu assigiimmik angajoqqaani tamaasa najugaqarfigisimappagit meeqqanut tapiissutit angajoqqaamut assersuutigalugu akilersuutinik pisartumut akilerneqartassapput. Angajoqqaat arlaannaalluunniit akilersuutinik akiliisanngippat, meeqqap inunnik nalunaarsuisarfimmi meeqqanut tapiissutinik siullermeerluni tunniussinermi allassimaffigisaani, ukiumut ilivitsumut angajoqqaap isertitai tunngavigalugit meeqqanut tapiissutit akilerneqartassapput.

Inuup maannakkut isertitami annertuumik ataavartumillu annikillisimasut qularnarunnaarsissinnaappagu isumaginnermi ataatsimiititaliap qaqutigoortumik aalajangersinnaavaa meeqqanut tapiissutit isertitassatut naatsorsuutigineqartut malillugit akilerneqassasut.

Paasisaqarnerorusukkuit quppernerit saqqaanni piumasarineqartut pillugit Inatsisit tunngaviusut toorlugu atuarit.

Nammineerlutit ilanngaatitaa piissanngilat. Systemip isumagissavaa.

Maannakkut isertitat qanoq naatsorsorneqarsinnaanersut paasisaqarfiginerorusukkukkit atuaruk